ගෘහස්ත ගෑස් සිලින්ඩර් කාන්දුවීමෙන්, ගිනි ගැනීමෙන් හෝ පුපුරායාමෙන් සිදුවන අනතුරු සම්බන්ධයෙන් තොරතුරු රැස් කිරීම සඳහා පොලිස් සම්බන්ධීකරණ නිලධාරීයා වශයෙන් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාව පත්කර තිබෙනවා.
මෙම පත්කිරීම පොලිස්පතිවරයා විසින් සිදුකර ඇති අතර දිවයිනේ ඕනෑම ස්ථානයක ගෑස් කාන්දුවීමක් මගින් සිදුවන පිපිරීමකදී අදාළ ප්‍රදේශය භාර පොලිස් ස්ථානාධිපතිවරයා වහාම දේශබන්දු තෙන්නකෝන් මහතා දැනුවත් කළ යුතු බවට පොලිස්පතිවරයා නියෝග කර තිබෙනවා.
ඒ අනුව අදාළ අනතුරෙහි තොරතුරු හා ඡායාරූප නොපමාව WhatsApp මාර්ගයෙන් දේශබන්දු තෙන්නකෝන් මහතාට යොමුකල යුතු බවත් ඊට අදාළ ගොනුවක් දින 03 ක් ඇතුළත දේශබන්දු තෙන්නකෝන් මහතාට යොමුකල යුතු බවටත් සදහන්.
එමෙන්ම ගෑස් සිලින්ඩර පුපුරායෑමක් සිදුවුවහොත් අදාළ මූලස්ථාන පොලිස් පරීක්ෂකවරයා හෝ ස්ථානාධිපතිවරයා අදාළ ගෑස් සිලින්ඩරය අයත් ගෑස් සමාගම හෝ නියෝජිත ආයතනය නොපමාව දැනුවත් කළ යුතු බවටද පොලිස්පතිවරයා නියෝග කර තිබෙනවා.
