මරණීය දණ්ඩනය නියම වූ හිටපු පාර්ලිමේන්තු මන්ත්‍රී දුමින්ද සිල්වාට ජනාධිපති සමාව ලබාදීමට එරෙහිව ගොනු කර ඇති පෙත්සම් විභාගයෙන් ශ්‍රේෂ්ඨාධිකරණ විනිසුරු ප්‍රියන්ත ජයවර්ධන මහතා ඉවත්වී තිබෙනවා.
ඒ ඊට අදාළ පෙත්සම් විභාගය අද (01) කැඳවූ අවස්ථාවේදීයි.
මරණ දඩුවම නියමවී සිරගතව සිටි දුමින්ද සිල්වා හට ජනාධිපති සමාව ලබාදීමට හිටපු ජනාධිපති ගෝඨාභය රාජපක්ෂ මහතා කටයුතු කළා.
කෙසේ වෙතත් පසුගිය ජූනි 01 වනදා අපරාධ පරීක්ෂණ දෙපාර්තමේන්තුවේ නිලධාරීන් පිරිසක් විසින් විසින් හිටපු පාර්ලිමේන්තු මන්ත්‍රී දුමින්ද සිල්වා ශ්‍රී ජයවර්ධනපුර මහ රෝහලේ ප්‍රතිකාර ලබමින් සිටියදී අත්අඩංගුවට ගනු ලැබූවා.
ඒ ඉකුත් මැයි 31 වනදා ශ්‍රේෂ්ඨාධිකරණයේ නියෝගයක් අනුවයි.
එහිදී ශ්‍රේෂ්ඨාධිකරණය නියෝග කළේ භාරත ලක්‍ෂ්මන් ප්‍රේමචන්ද්‍ර ඝාතන චෝදනාවට වරදකරුවී මරණ දඩුවම නියමව සිටියදී ජනාධිපති සමාව යටතේ නිදහස ලැබූ දුමින්ද සිල්වාගේ ජනාධිපති සමාව වහාම අත්හිටුවා ඔහුව අත්අඩංගුවට ගන්නා ලෙසයි.
දුමින්ද සිල්වාට ජනාධිපති සමාවදීම අභියෝගයට ලක්කරමින් හිරුණිකා ප්‍රේමචන්ද්‍ර, ඇයගේ මව සුමනා ප්‍රේමචන්ද්‍ර සහ මානව හිමිකම් කොමිසමේ හිටපු කොමසාරිස්වරයෙකු වන ජනාධිපති නීතිඥ ගසාලි හුසේන් ඇතුළු පිරිසක් ගොනු කළ මූලික අයිතිවාසිකම් පෙත්සම් 03ක් විභාගයට ගැනීමට අවසර දෙමින් ශ්‍රේෂ්ඨාධිකරණය පසුගිය මැයි 31 වනදා මෙම අතුරු නියෝග නිකුත් කළා.
