තෙදින නිල සංචාරයක් සඳහා දිවයිනට පැමිණ සිටින ඉන්දීය විදේශ අමාත්‍ය ආචාර්ය එස්. ජයශංකර් මහතා කොළඹ පිහිටි ලංකා IOC සමාගමේ ඉන්ධන පිරවුම්හල වෙත ගොස් තිබෙනවා.
එහි කළමණාකාර අධ්‍යක්ෂ මනෝජ් ගුප්තා මහතා හමුවී සාකච්ඡා කිරීමෙන් අනතුරුව මේ වන විට පවත්නා ඉන්ධන සැපයුම් තත්ත්වය පිළිබදව ඒ මහතාව දැනුවත් කළ බව ට්විටර් පණිවුඩයක් නිකුත් කරමින් ඉන්දීය විදේශ අමාත්‍ය ආචාර්ය එස්. ජයශංකර් මහතා පවසනවා.
ඔහු සදහන් කරන්නේ ඉන්ධන වෙනුවෙන් ඉන්දියාව ලබාදුන් ඇමරිකානු ඩොලර් මිලියන 500 ක මූල්‍ය සහයෝගීතාවය ශ්‍රී ලාංකිකයන්ගේ එදිනෙදා ජීවිතයට උපකාරී වනු ඇති බවයි.
අදාළ ට්විටර් පණිවුඩය සිංහල, දෙමළ හා ඉංග්‍රීසි යන භාෂා ත්‍රිත්වයෙන්ම පලකර තිබීම විශේෂත්වයක්.
තෙදින නිල සංචාරයක් සඳහා දිවයිනට පැමිණ සිටින ඉන්දීය විදේශ අමාත්‍ය ආචාර්ය එස්. ජයශංකර් මහතා අද (28) පෙරවරුවේ ජනාධිපති ගෝඨාභය රාජපක්ෂ මහතාද හමුවුණා.
කොළඹ දී ඇරඹෙන පස්වන බිම්ස්ටෙක් සමුළුවට සහභාගී වීම සඳහා ජයශංකර් මහතා මෙලෙස දිවයිනට පැමිණ තිබෙනවා.
ඔහුගේ පැමිණීම පිළිබඳ සතුට පළකළ ජනාධිපතිවරයා ආහාර, ඖෂධ ඇතුළු අත්‍යාවශ්‍ය ද්‍රව්‍ය ආනයනය සඳහා ඇමෙරිකානු ඩොලර් බිලියනයක ණය ප්‍රදාන ලබාදීම පිළිබඳ සිය ස්තූතිය පළකර තිබෙනවා.
මේ වසරේ දී ශ්‍රී ලංකාව සහ ඉන්දියාව අතර රාජ්‍ය තාන්ත්‍රික සබඳතාවලට 75වසරක් සැපිරීම නිමිත්තෙන් සමරු කාසියක් සහ සමරු මුද්දරයක් නිකුත්කිරීම ඇතුළු සැමරීමේ උත්සව ගණනාවක් මේ වන විට සංවිධානය කර තිබෙනවා.
