වාහනයක් මිලදී ගැනීම සඳහා කැමති පාර්ලිමේන්තු මන්ත්‍රීවරුන්ට තීරු බදු රහිත බලපත්‍ර ලබා දෙන බව අග්‍රාමාත්‍ය මහින්ද රාජපක්ෂ මහතා නැවත වරක් ප්‍රකාශ කර ඇති බව වාර්තා වනවා.
ජනාධිපතිවරයාගේ ප්‍රධානත්වයෙන් ඊයේ (24) ජනාධිපති මන්දිරයේ පැවති ආණ්ඩු පක්ෂ කණ්ඩායම් රැස්වීමේදී අගමැතිවරයා මේ බව ආණ්ඩු පක්ෂයේ මන්ත්‍රීවරුන් හට පවසා තිබෙනවා.
පාර්ලිමේන්තු මන්ත්‍රී තිස්ස කුට්ටිආරච්චි මහතා කණ්ඩායම් රැස්වීමේදී සිදුකළ ප්‍රකාශයක් හේතුවෙන් අග්‍රාමාත්‍යවරයා මෙම ප්‍රකාශය සිදුකර ඇති බවයි වාර්තා වන්නේ.
තිස්ස කුට්ටිආරච්චි මහතා පවසා ඇත්තේ තමා ඇතුළු මන්ත්‍රී කණ්ඩායම වාහනයක් වත් නොමැතිව රජය ආරක්ෂා කිරීමට කටයුතු කරන බවයි.
පසුව අග්‍රාමාත්‍යවරයා ආණ්ඩු පක්ෂයේ මන්ත්‍රීවරුන්ගෙන් විමසා ඇත්තේ තමන්ට වාහන අවශ්‍ය නැති බව කියන මන්ත්‍රීවරු අත් ඔසවන ලෙසයි.
ඊට ප්‍රතිචාර වශයෙන් ආණ්ඩු පක්ෂයේ කිසිදු මන්ත්‍රීවරයෙක් අත් ඔසවා නොමැතිවීම විශේෂත්වයක්.
පසුය යළිත් වරක් අග්‍රාමාත්‍යවරයා විමසා ඇත්තේ තමන්ට වාහනයක් අවශ්‍ය බව පවසන මන්ත්‍රීවරුන්ට අත් ඔසවන ලෙසයි.
ඊට ප්‍රතිචාර වශයෙන් මන්ත්‍රීවරුන් සියලුම දෙනා අත් ඔසවා ඇති අතර ඇතැම් මන්ත්‍රීවරුන් දෑතම ඔසවා ඇති බවයි වාර්තා වන්නේ.
පසුව ඔවුනට තීරුබදු රහිත බලපත්‍ර ලබාදෙන බවට අග්‍රාමාත්‍ය මහින්ද රාජපක්ෂ මහතා පැවසීමත් සමඟම ආණ්ඩු පක්ෂයේ මන්ත්‍රීවරුන් අත්පොළසන් දී සිය සතුට පලකර තිබෙනවා.
