පොසොන් පොහොය දිනය නිමිත්තෙන් යැයි පවසා හිටපු පාර්ලිමේන්තු මන්ත්‍රී දුමින්ද සිල්වා හට හිටි හැටියේ ජනාධිපති සමාව ලබාදීම සම්බන්ධයෙන් හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මිය News19 වෙත විශේෂ ප්‍රකාශයක් සිදුකර සිටියා.
හිරුණිකා ප්‍රේමචන්ද්‍ර යනු ඝාතනයට ලක්වූ භාරත ලක්ෂ්මන් ප්‍රේමචන්ද්‍ර මහතාගේ දියණියයි.
හිරුණිකා ප්‍රේමචන්ද්‍ර මහත්මිය පවසන්නේ ජනාධිපතිවරයා මේ වන විට කිහිපදෙනෙකුගේ අතකොළුවක් බවට පත්ව ඇති බවයි.
එක රටක් එක නීතියක් යන තේමාව යටතේ ජනාධිපතිවරයා ජනාධිපතිවරණය ජයග්‍රහණය කළද අද වන විට එය හුදෙක් වචන කිහිපයක් බවට පත්ව ඇති බවද අය සිහිපත් කරනවා.
මෙලෙස වැරදිකරුවන් ජනාධිපතිවරයාගේ හිතුමනාපයට නිදහස් කරන්නේ නම් නීතිය හා විනිසුරුවරුන් කුමකටදැයි ඇය ප්‍රශ්න කර සිටියා.
භාරත ලක්ෂ්මන් ප්‍රේමචන්ද්‍ර ඝාතනයට ලක්වූ මොහොතේ රාජපක්ෂ පවුලේ සියලු දෙනාම ඔහුට අවසන් ගෞරව දැක්වීමට පැමිණියද ගෝඨාභය රාජපක්ෂ මහතා නොපැමිණි බවත් ඒ වෙනුවට ගෝඨාභය මහතා සිදුකළේ දුමින්ද සිල්වා බැලීම සදහා ජයවර්ධනපුර රෝහලට යෑම බවත් ඇය සිහිපත් කළා.
තවදුරටත් මෙම ජනාධිපතිවරයාගෙන් ශ්‍රී ලංකාවට යහපතක් සිදුවේ යැයි තමන් විශ්වාස නොකරන බවත් දුමින්ද සිල්වා නැවතත් ඔහු යටතේ දේශපාලනයට ගෙනවිත් දැමුවද තමන් පුදුම නොවන බවත් ඇය සඳහන් කළා.
මෙම ක්‍රියාව සම්බන්ධයෙන් ජනාධිපතිවරයාට ලිපියක් යොමුකරන බවද ඇය News19 වෙත පවසා සිටියා.
