ගාලුමුවදොරදී හා කොල්ලුපිටියේදී මැයි 09 වැනි දින අරගලකරුවන්ට පහරදීමේ සිද්ධියට අදාළව ප්‍රකාශයක් ලබාගැනීමට ඊයේ (23) දිනයේදී පැමිණෙන ලෙස ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතාට අපරාධ පරීක්ෂණ දෙපාර්තමේන්තුව විසින් දැනුම්දීමක් කර තිබුණා.
කෙසේ වෙතත් ඊයේ දිනයේ ඔහු අදාළ ප්‍රකාශය ලබාදීමට පැමිණ නැති බවයි වාර්තා වන්නේ.
පසුගිය 09 වනදා එවක අග්‍රාමාත්‍ය මහින්ද රාජපක්ෂ මහතා ධූරයෙන් ඉල්ලා අස්වීම වෙනුවෙන් අරලියගහ මන්දිරයේදී පැවති පාක්ෂිකයන් හමුවේදී ජොන්ස්ටන් ප්‍රනාන්දු මහතා ප්‍රකෝපකාරී කතාවක්ද පැවැත්වූවා.
ඉන් අනතුරුව එහි රැස්ව සිටි පිරිස් අරලියගහ මන්දිරයෙන් ඉවතට පැමිණ මයිනාගෝගමට හා ගෝඨාගෝගමට අමානුෂික ලෙස පහරදීමක් සිදුකළා.
එදිනම රාත්‍රියේ ජොන්ස්ටන් ප්‍රනාන්දුට අයත් කුරුණෑගල ප්‍රදේශයේ ස්ථාන කිහිපයක ඇති ඔහුගේ දේපල රැසක් ගිනිතබා විනාශ කර තිබුණා.
කුරුණෑගල ප්‍රදේශයේදී විරෝධතාකරුවන් විසින් ගිනි තබා විනාශ කළ හිටපු ඇමැති ජෝන්ස්ටන් ප්‍රනාන්දු, කුරුණෑගල නගරාධිපති තුෂාර සංජීව හා කුරුණෑගල ප්‍රාදේශීය සභා සභාපති අචල නිමන්ත යන අයගේ නිවෙස්වල තිබී කිලෝග්‍රෑම් 12.5ක් බරැති ගෑස් සිලින්ඩර 140ක් පමණ හමුවී තිබූ බව මාධ්‍ය වාර්තා කළා.
