විපක්ෂනායකවරයා ජනතා විමුක්ති පෙරමුණ සම්බන්ධ කර ගනිමින් සර්වපාක්ෂික ආණ්ඩුවක් පිහිටුවීමට කටයුතු කරන බවට තොරතුරු වාර්තා වන බව හිටපු අමාත්‍ය වාසුදේව නානයක්කාර පවසනවා.
ඒ, ආණ්ඩුවෙන් ස්වාධීන වූ පාර්ලිමේන්තු මන්ත්‍රී කණ්ඩායමේ සතිපතා පැවැත්වෙන රැස්වීම ඊයේ ශ්‍රී ලංකාවේ කොමියුනිස්ට් පක්ෂ මූලස්ථානයේදී පැවැත්වීමෙන් අනතුරුව මාධ්‍ය වෙත අදහස් දක්වමින්.
එම රැස්වීමට පොදුජන පෙරමුණේ පාර්ලිමේන්තු මන්ත්‍රී ප්‍රේම්නාත් සී. දොළවත්ත මහතාද එක්ව සිටීම විශේෂත්වයක්.
එහිදී වැඩිදුරටත් අදහස් දැක්වූ පාර්ලිමේන්තු මන්ත්‍රී වාසුදේව නානායක්කාර,
ප්‍රශ්නය –
“එදා ඉඳලා කියනවා සර්ව පාක්ෂික ආණ්ඩුව ගැන. කවදාද ඕක හැදෙන්නේ ? කවුද කකුලෙන් අදින්නේ ?”
වාසුදේව –
“කකුලෙන් අදින්නේ නැහැ. බෙල්ලෙන් අල්ලා අපිව තල්ලුකරලා දාලා තියෙන්නේ.”
ප්‍රශ්නය –
“කවුද ?”
වාසුදේව –
“ගෝඨාභය”
ප්‍රශ්නය –
“ඔහු පමණමද ?”
වාසුදේව –
“ඔහු පිටුපසෙන් මොන අවතාරය ඉන්නවාද දන්නේ නැහැ. ඔහු තමයි බෙල්ලෙන්ම අල්ලා අපිව එළියට දාලා රනිල්ව වැද්දගෙන තියෙන්නේ බංකුව යටට.”
ප්‍රශ්නය –
“ජනාධිපතිතුමාත් අගමැතිතුමාත් මත දෙකක ඉන්නවා නම් මේ ආණ්ඩුව ගෙනියන්න පුළුවන්ද ඉදිරියට ?”
වාසුදේව –
“ජනාධිපතිතුමාත්, අගමැතිතුමාත් මත දෙකක නැහැ දැනට. කථා යනවා… රනිල්ව අයින්කරන්න යන්නේ කියලා. මට පේන හැටියට සජිත් උත්සාහ කරන්නේ, සර්ව පාක්ෂික ආණ්ඩුවක් හදන්න ජෙවිපෙ එක්ක එකතුවෙලා. එයාට අගමැති වෙන්න ඕනේ වෙලා තියෙන්නේ.”
ප්‍රශ්නය –
“ඔබතුමාලා සහයෝගය ලබාදෙනවාද ?”
වාසුදේව –
“සර්ව පාක්ෂික ආණ්ඩුව හැදෙනවා නම් ඒකේ ප්‍රතිපත්තිය හා ක්‍රියාමාර්ගය පමණයි අපිට වැදගත්.”
