මාධ්‍යවේදී චමුදිත සමරවික්‍රම මහතාගේ පිළියන්දල ගංගාරාම පාරේ පිහිටි නිවසට අද (14) අළුයම 2 ට පමණ නාදුනන පිරිසක් විසින් ප්‍රහාරයක් එල්ලකර තිබෙනවා.
පැමිණි පුද්ගලයින් නිවසට ගල් හා අසූචි ප්‍රහාරයක් එල්ලකර ඇති අතර ඉන් නිවසට සැලකිය යුතු අලාභහානියක් සිදුව තිබෙනවා.
මාධ්‍යවේදී චමුදිත සමරවික්‍රමට ඇති තර්ජන සම්බන්ධයෙන් ශ්‍රී ලංකා තරුණ ජනමාධ්‍යවේදීන්ගේ සංගමය විසින් මීට පෙරද පැමිණිලි කර තිබූ නමුත් අදාල සංගමයෙන් ප්‍රකාශයක් සටහන් කර ගත්තද, පැමිණිල්ල සම්බන්ධයෙන් ගත් ක්‍රියාමාර්ග ගැන දැනුම්දීමක් සිදු නොකළැ බවයි පොලිස්පතිවරයා වෙත ලිපියක් යොමු කරමින් එම සංගමය පවසන්නේ.
එබැවින් නිවසට ප්‍රහාරයක් එල්ලවීම ගැන ඔහුගේ පැමිණිල්ල කඩිනමින් විමර්ශනය කරන ලෙසත්, ඔහුට යම් ජීවිත තර්ජනයක් ඇත්නම් ඔහුගේ ආරක්ෂාව තහවුරු කරන ලෙසත් ශ්‍රී ලංකා තරුණ ජනමාධ්‍යවේදීන් සංගමය පොලිස්පතිවරයාගෙන් ඉල්ලා සිටිනවා.
පොලිස්පතිතුමා,
පොලිස් මූලස්ථානය,
කොළඹ.
පොලිස්පතිතුමනි,
චමුදිත සමරවික්‍රම මහතාගේ නිවසට ප්‍රහාරයක් එල්ල කිරීම සම්බන්ධවයි
මාධ්‍යවේදී චමුදිත සමරවික්‍රම මහතාගේ නිවසට අද අලුයම ප්‍රහාරයක් එල්ල වී ඇති බව හිරු රූපවාහිනිය වාර්තා කළේය. ඒ සම්බන්ධයෙන් සමරවික්‍රම මහතා පොලිසියට පැමිණිල්ලක්ද කර තිබේ.
තමාට ජීවිත තර්ජනයක් ඇති බවත්, කිසියම් පිරිසක් තමා මරා දැමීමට උත්සාහ කරන බවත් මාධ්‍යවේදී හරීන්ද්‍ර ජයලාල් මහතා සමඟ සම්මුඛ සාකච්ඡාවකට එක්වෙමින් සමරවික්‍රම මහතා මීට පෙර ප්‍රකාශ කර තිබුණු අතර ඒ ගැන වමර්ශනයක් කරන ලෙස අප සංගමය පොලිස්පතිවරයාගෙන් ලිඛිතව ඉල්ලීමක් ද කළේය.
එවැනි ඉල්ලීමක් කරන්නේ ඇයිද යන්න ගැන පොලිසිය අප සංගමයෙන් ප්‍රකාශයක් සටහන් කර ගත්තද, පැමිණිල්ල සම්බන්ධයෙන් ගත් ක්‍රියාමාර්ග ගැන දැනුම්දීමක් කළේ නැත.
මාධ්‍යවේදියකුට පමණක් නොව ඕනෑම පුරවැසියකුට භාෂණයේ හා ප්‍රකාශනයේ අයිතිය සහ ජීවත්වීමේ අයිතිය හිමිවන අතර එය සුරක්ෂිත කිරීම ආණ්ඩුවේ සහ පොලිසියේ වගකීමක් බව අප සංගමයේ අදහසයි.
එසේ හෙයින් නිවසට ප්‍රහාරයක් එල්ලවීම ගැන ඔහුගේ පැමිණිල්ල කඩිනමින් විමර්ශනය කරන ලෙසත්, ඔහුට යම් ජීවිත තර්ජනයක් ඇත්නම් ඔහුගේ ආරක්ෂාව තහවුරු කරන ලෙසත් ශ්‍රී ලංකා තරුණ ජනමාධ්‍යවේදීන් සංගමය ලෙස අපි ඉල්ලා සිටිමු.
ස්තුතියි.
මෙයට,
විශ්වාසී,
ශ්‍රී ලංකා තරුණ ජනමාධ්‍යවේදීන්ගේ සංගමය
පිටපත්
1) සභාපති, ශ්‍රී ලංකා මානව හිමිකම් කොමිසම – මීට පෙර පැමිණිල්ලට ගත් ක්‍රියාමාර්ග ගැන සහ මෙම සිදුවීම ගැන විමර්ශනයක් කිරීම සඳහා
