ප්‍රධාන විපක්ෂය සහ විපක්ෂයේ අනෙකුත් පක්ෂ එක් කර ඉතිහාසයේ පළමු සම්මුතිවාදී රජය ගොඩනැංවීම පිණිස ජනාධිපති ධුරය සඳහා ඉදිරිපත්වීමට තීරණය කළ බව පාර්ලිමේන්තු මන්ත්‍රී ඩලස් අලහප්පෙරුම පවසනවා.
සිය නිල ට්විටර් ගිණුමේ සටහනක් තබමින් ඔහු පවසන්නේ මෙමගින් ඉතිහාසය වෙළාගත් වංචනික දේශපාලන සංස්කෘතිය අවසන් කරන බවයි.
කෙසේවෙතත් මේ වන විට ශ්‍රී ලංකා පොදුජන පෙරමුණ තුළින්ම ඩලස් අලහප්පෙරුම මහතාට විරෝධය එල්ලවී තිබෙනවා.
එහි එක්පාර්ශවයක් රනිල් වික්‍රමසිංහ මහතාට ඡන්දය පලකිරීමට මේ වන විටත් කැමැත්ත පලකර ඇති අතර තවත් පාර්ශවයක් ඩලස් අලහප්පෙරුම මහතාට සහය පලකර තිබෙනවා.
බැසිල් රාජපක්ෂ මහතාගේ කීකරු ගෝලයෙකු වන සාගර කාරියවසම් මහතා ශ්‍රී ලංකා පොදුජන පෙරමුණේ තීරණය ලෙස පක්ෂයේ ලිපි ශීර්ෂය යටතේ නිකුත් කරන ලද ලිපියකින් පැවසුවේ තම පක්ෂය රනිල් වික්‍රමසිංහ මහතාට සහය පලකරන බවයි.
කෙසේවෙතත් අද (16) පාර්ලිමේන්තුවෙන් ඉවතට පැමිණි හිටපු අධිකරණ අමාත්‍ය අලි සබ්රි මහතා සඳහන් කළේ පක්ෂය එවන් තීරණයක් ගෙන ඇති බවට තමන් නොදන්නා බවයි.
එමෙන්ම පාර්ලිමේන්තු මන්ත්‍රී ප්‍රේම්නාත් සී. දොළවත්ත මහතා සදහන් කළේ පක්ෂයේ ලිපි ශිර්ෂ යොදාගනිමින් තමන්ගේ පෞද්ගලික මතය ඉදිරිපත් කිරීමේ රෝගයක් පක්ෂ මහලේකම් සාගර කාරියවසම් මහතාට ඇති බවයි.
