සිය සොහොයුරු ෂෙබාස් ෂරීෆ් පාකිස්ථානයේ අග්‍රාමාත්‍යවරයා ලෙස පත්වීමත් සමඟ එරට තෙවරක් අග්‍රාමාත්‍ය ධුරය දැරූ නවාස් ෂරීෆ් යළි පාකිස්ථානයට පැමිණීමට තීරණය කර ඇති බව වාර්තා වනවා.
මේ වනවිට ලන්ඩනයේ ජීවත්වන නවාස් ෂරීෆ් ලබන මස මුලදී සිය මව්බිම වෙත පැමිණෙන්නේ රාමසාන් උපවාසය අවසන් කිරීමෙන් පසුව බවයි විදෙස් මාධ්‍ය වාර්තා කරන්නේ.
නවාස් ෂරීෆ් අග්‍රාමාත්‍ය ධුරය හෙබ වූ කාල වකවානුව තුළ සිදුකළ බවට මුල්‍ය ඇතුළු දූෂණ චෝදනා රැසක් ඔහුට එල්ල වුණා.
එම චෝදනාවන්ට නවාස් ෂරීෆ්ට වසර 07ක සිරදඬුවමක් නියම කෙරුණා.
කෙසේ වෙතත් ඔහු 2019 වසරේ අග භාගයේ ප්‍රතිකාර ලබා ගැනීමට ලන්ඩනය බලා පිටත්ව ගියේ එම නඩුවෙන් ඇප හිමව, පාකිස්ථාන අධිකරණයෙන් විශේෂ අවසරයක් ලැබීමෙන් පසුවයි.
පාකිස්ථානයේ හිටපු අග්‍රාමාත්‍ය ඉම්රාන් ඛාන්ව එරට විපක්ෂය විසින් විශ්වාසභංගයකින් පරාජය කිරීමත් සමඟ ඔහුට අගමැති අසුන හැර යන්නට පසුගිය දා සිදු වුණා.
ඒ අනුව පාකිස්ථානයේ නව අග්‍රාමාත්‍යවරයා ලෙස ෂෙබාස් ෂරීෆ් අද (11) දිනයේ තෝරා පත්කර ගනු ලැබුවා.
