මාවනැල්ල, හිඟුල ප්‍රදේශයේ ගල් කෝරියකින් අතුරුදන් වූ පුපුරණ ද්‍රව්‍ය තොගය පේරාදෙණිය – තලවත්ත ප්‍රදේශයේ තිබි අපරාධ පරීක්ෂණ දෙපාර්තමේන්තුවේ නිලධාරීන් විසින් සොයාගෙන තිබෙනවා.
පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා සඳහන් කරන්නේ අදාළ සිද්ධිය සම්බන්ධයෙන් පුද්ගලයින් සිව් දෙනෙකු මේ වන විට සැකපිට අත්අඩංගුවට ගෙන ඇති බවයි.
අදාල පුපුරණ ද්‍රව්‍ය අතර ඇමෝනියම් නයිට්‍රේට්, වෝටර් ජෙල්, සේවා නූල් ඩෙටනේටර්ස්, බීම් යනාදිය තිබූ බවට පොලිස් මාධ්‍ය ප්‍රකාශකවරයා සදහන් කරනවා.
පළමු සැකකරු ලෙස මීට පෙර එම ගල් කෝරියේ සේවයේ නියුතු පුද්ගලයෙක් අත්අඩංගුවට ගෙන ඇති අතර, මේ වන විට ඔහු රක්ෂිත බන්ධනාගාර ගත කර තිබෙනවා.
ඔහු එම සිදුවීමට ඍජු සම්බන්ධයක් ඇති බවට අනාවරණය වීමෙන් අනතුරුව ලද තොරතුරු මත සෙසු සැකකරුවන් තිදෙනා අද අත්අඩංගුවට ගත් බවයි පොලිස් මාධ්‍ය ප්‍රකාශකවරයා සදහන් කලේ.
කෙසේ වෙතත් මෙම සිදුවීමට කිසිදු ආකාරයක අන්තවාදී හෝ ත්‍රස්තවාදී සංවිධානවල කිසිදු සබඳතාවයක් නොමැති බවට අනාවරණය වී ඇති බවද ඔහු සදහන් කළා.
වෙනත් ගල් කොරි පවත්වාගෙන යන අයට අලෙවි කිරීම සදහා මෙම පුපුරණ ද්‍රව්‍ය තොගය සොරාගෙන ඇති බවටයි පොලිස් මාධ්‍ය ප්‍රකාශකවරයා සදහන් කරන්නේ.
