මහනුවර දළදා පෙරහැරට සහභාගීවූ නැටුම් කණ්ඩායමක පුද්ගලයින් 45 දෙනෙකු හට කොවිඩ් 19 වෛරසය ආසාදනය වී ඇති බවට හදුනාගෙන තිබෙනවා.
කතරගම දේවාලය නියෝජනය කරමින් දළදා පෙරහැරේ ගිය කලාකරුවන් 76 දෙනෙකුට සිදුකල රැපිඩ් ඇන්ටිජන් පරික්ෂාවකින් අනතුරුව එම පුද්ගලයින්ගෙන් 45 දෙනෙකු ආසාදිතයන් බවට හදුනාගත් බව සෞඛ්‍ය අංශ පවසනවා.
හතරවන රන්දෝලි පෙරහැර නිමාවීමෙන් අනතුරුව ඔවුන්ට සිදුකල ඇන්ටිජන් පරික්ෂාවේදී මෙම ආසාදිතයන් හදුනාගෙන තිබෙන බවයි වාර්තා වන්නේ.
මහනුවර ජාතික රෝහල සහ මහනුවර මහ නගර සභාවේ නාගරික සෞඛ්‍ය අංශය විසින් පෙරහර මංගල්‍යයට සහභාගී වන සියලු කලාකරුවන් දෛනිකව ඇන්ටිජන් පරීක්ෂාවට ලක් කරනු ලබනවා.
කෙසේ වෙතත් මුහුණු ආවරණයක් හෝ නොමැතිව ඇතැම් නර්තන කණ්ඩායම් පෙරහැරේ යන ආකාරය අප මීට පෙරද වාර්තා කළා.
එමෙන්ම රට වසා තිබියදී හා සියලු ආගමික උත්සවද තහනම් කර තිබෙන තත්ත්වයකදී දළදා පෙරහැර පමණක් විශේෂ අවසරයක් මත පැවැත්වීමට බලධාරීන් අවසර ලබාදී තිබෙනවා.
අද (22) දිනයේ අවසන් රන්දෝලි පෙරහැර විදි සංචාරය කිරීමට නියමිතයි.
