ජනාධිපති ගෝඨාභය රාජපක්ෂ මහතාගේත්, අග්‍රාමාත්‍ය මහින්ද රාජපක්ෂ මහතාගේත්, මුදල් අමාත්‍ය බැසිල් රාජපක්ෂ මහතාගේත් ඥාති සොහොයුරියක් වන නිරූපමා රාජපක්ෂ මහත්මියගේ නම ආන්දෝලනාත්මක පැන්ඩෝරා පත්‍රිකා වල සඳහන් වී මාස 3 ක් ගතව තිබෙනවා.
කෙසේ වෙතත් මෙම සිදුවීමට අදාළව ඇයට හෝ ඇයගේ සැමියා වන තිරු නඩේසන් මහතාට එරෙහිව කිසිදු නීතිමය ක්‍රියාමාර්ගයක් මේ වන තෙක් ක්‍රියාත්මක වී නැහැ.
තිරුකුමාර් නඩේසන් මහතා සමග එක්ව නිරූපමා රාජපක්ෂ මහත්මිය ව්‍යාජ සමාගමක් (shell company) පවත්වාගෙන ගිය බවත් ඒ හරහා ලන්ඩන් සහ සිඩ්නි නගරවල නිවාස මිලට ගැනීම සහ වෙනත් ආයෝජනවල යෙදීම සිදුවූ බවත් පැන්ඩෝරා පත්‍රිකා වල සඳහන්ව තිබුණා.
පසුගිය වසරේ ඔක්තෝම්බර් 4 වන දින අදාළ අනාවරණය සිදුවූ අතර ඉන් අනතුරුව ඉන් දින දෙකකට පසුව පැන්ඩෝරා පත්‍රිකාවල නම සදහන් ශ්‍රී ලාංකිකයන් සහ එම ගනුදෙනු පිළිබදව වහාම පරීක්ෂණයක් පවත්වා මසක් ඇතුළත තමන්ට වාර්තාවක් සපයන ලෙසට ජනාධිපති ගෝඨාභය රාජපක්ෂ මහතා නියෝග කළා.
ඉන් මසකට වැඩි කාලයකින් අනතුරුව පසුගිය වසරේ නොවැම්බර් මස අල්ලස් හෝ දූෂණ විමර්ශන කොමිෂන් සභාව මේ සම්බන්ධයෙන් අතුරු වාර්තාවක් පමණක් ජනාධිපතිවරයාට ලබාදී තිබුණා.
සිදුවීමට මාස 3 ක් ගතව තිබුණද මෙතරම් දැවැන්ත මූල්‍ය වංචාවක් සම්බන්ධයෙන් තවමත් කිසිදු නීතිමය ක්‍රියාමාර්ගයක් නොගෙන කල්මැරීම විශේෂත්වයක්.
