අද රට පත්ව තිබෙන තත්වය හමුවේ ඇමති ධුරවලින් ඉල්ලා අස් වී රටට ආදර්ශයක් දිය යුත්තේ ශ්‍රී ලංකා නිදහස් පක්ෂයේ අය නොව රාජපක්ෂ පවුලේ අය බවට ශ්‍රී ලංකා නිදහස් පක්ෂය පවසනවා.
ශ්‍රී ලංකා නිදහස් පක්ෂයේ ඇමතිවරු ආණ්ඩුවෙන් ඉල්ලා අස් වී රටට ආදර්ශයක් ලබා දිය යුතු බවට නාමල් රාජපක්ෂ කර ඇති ප්‍රකාශය සම්බන්ධ අදහස් දක්වමින් එම පක්ෂයේ ජ්‍යෙෂ්ඨ උප සභාපති මහාචාර්ය රෝහණ ලක්ෂ්මන් පියදාස මහතා පවසන්නේ රට ගිනිගෙන තිබෙන මොහොතක විදේශයන්ට ගොස් ජල ක්‍රීඩාවේ යෙදෙන නාමල් රාජපක්ෂ තම පක්ෂයේ ඇමතිවරුන්ට ඉල්ලා අස් වී ආදර්ශයක් ලබා දෙන්නැයි කළ ප්‍රකාශය විහිලු සහගත එකක් බවයි.
මහාචාර්යවරයා වැඩිදුරටත් කීවේ රට දැවැන්ත ආර්ථික අර්බුදයකට පත් වී ජනතාව අන්ත අසරණව සිටින මේ වැනි ඛේදනීය තත්වයක දී රට රටවලට ගොස් ජල ක්‍රීඩා කරන නාමල් රාජපක්ෂ වැනි අය මුලින්ම ඉල්ලා අස් වීම රටට වැදගත් බවයි.
නාමල් රාජපක්ෂ වැනි අය කැපකිරීම් කරන ලෙස ශ්‍රී ලංකා නිදහස් පක්ෂයෙන් සහ රටෙන් ඉල්ලා සිටින්නේ තවමත් පෙට්‍රල් ලීටරයකට කිලෝ මීටර පහක් හයක් හෝ ධාවන කළ නොහැකි අධි සුඛෝපභෝගී වාහන පමණක් පාවිච්චි කරමින් සකල විධ සැප සම්පත් සහිතව ගෙවන කුමාර ජීවිතයේ වියදම ශතයකින්වත් අඩු කර නැති වටපිටාවක බවත් මහාචාර්යවරයා පෙන්වා දෙනවා.
රට මුහුණපා ඇති ආර්ථික අර්බුදයෙන් රට ගොඩගැනීමට විධිමත් සැලසුමක් සකස් කිරීම ආණ්ඩුවේ වගකීම වුවත් මේ ආණ්ඩුවේ කැබිනට් මණ්ඩල රැස්වීම්වල දී එවැනි සැලැස්මක් හෝ අභියෝග ජයගත හැකි ක්‍රමවේදයක් සකස් කිරීම සඳහා කැබිනට් මණ්ඩලය තුළ කිසිම සාකච්ඡාවක් පවත්වා නැති බවද ඔහු වැඩිදුරටත් පවසනවා.
