සමගි ජනබලවේගය විසින් අද (16) දින ‘ජන බල වේගය කොළඹට’ යන මැයෙන් පවත්වනු ලබන විරෝධතාවය සම්බන්ධයෙන් පොලීසිය විසින් කරනු ලැබූ ඉල්ලීම කොළඹ ප්‍රධාන මහේස්ත්‍රාත් වරයා ප්‍රතික්ෂේප කර ඇති පසුබිමක එම විරෝධතාවයට සහභාගී වන්නන්ට පොලිසිය විසින් බාධා කරන අයුරු දිවයිනේ විවිධ ස්ථාන වලින් වාර්තා වනවා.
කොළඹට පැමිණීමට සූදානම් වන එම ජනතාවට එසේ පැමිණීමට ඉඩ නොදී අවහිර කරන අයුරු විවිධ ස්ථාන වලදී දැකගත හැකිවනවා.
කොළඹ ප්‍රධාන මහේස්ත්‍රාත් බුද්ධික. සී. රාගල මහතා ඊයේ දින පොලිසියේ ඉල්ලීම ප්‍රතික්ෂේප කරමින් පවසා සිටියේ සෞඛ්‍ය සේවා අධ්‍යක්ෂ ජෙනරාල්වරයා විසින් නිකුත් කර තිබෙන මාර්ගෝපදේශ වල මහජන රැස්වීම් වලට සහභාගී වීය හැකි පුද්ගල සංඛ්‍යාව හෝ ප්‍රතිශතයක් පිළිබඳව කරුණු දක්වා නොමැති පසුබිමක තමාට එවැනි තහනම් නියෝගයක් ලබාදීමට නොහැකි බවයි.
කෙසේ වෙතත් නිරෝධායන නීති උල්ලංඝනය වන ආකාරයෙන් කටයුතු කළහොත් ඊට එරෙහිව නීතිමය පියවර ගැනීමට පොලීසියට හැකියාව පවතින බව ද මෙහිදී මහේස්ත්‍රාත්වරයා අවධාරණය කළා.
කෙසේ වෙතත් මේ වන විට පොලිසිය එම නියෝගයට පිටින් කටයුතු කරමින් සිටින බවක් දැකගත හැකිවනවා.
මෙලෙස බාධා කිරීම් සිදු කරන්නේ කවර අධිකරණයේ නියෝගයක් මතදැයි ජනතාව පොලිසියෙන් ප්‍රශ්න කිරීමේදී පොලිස් නිලධාරීන් නිරුත්තර වන අයුරුද දැකගත හැකිවිය.
