චින සමාගමක් විසින් අහිතකර බැක්ටීරියා අඩංගු බාල පොහොර මෙරටට ලබාදුන්නේ වැරදීමකින් බව කෘෂිකර්ම අමාත්‍ය මහින්දානන්ද අලුත්ගමගේ මහතා පවසනවා.
ඒ, ඊයේ (02) දින මාධ්‍ය අමතමින්.
එම අහිතකර කාබනික පොහොර නැව නැවත හරවා යවා ඇති බවත් එම වැරැද්ද නිවැරදි කර නියමිත ප්‍රමිතියෙන් යුතු නැවත පොහොර තොගයක් එවීමට ඔවුන් පොරොන්දු වී ඇති බවත් අමාත්‍යවරයා පවසනවා.
එසේ ආනයනය කරන පොහොරද පරීක්ෂා කර ඒවා නිවැරදි ප්‍රමිතියෙන් යුතු නම් පමණක් භාරගන්නා බවයි ඔහු පවසන්නේ.
එමෙන්ම ඉන්දියාවෙන්ද යම් පොහොර ප්‍රමාණයක් ආනයනය කිරීමට බලාපොරොත්තු වන බවයි මහින්දානන්ද අලුත්ගමගේ මහතා පවසන්නේ.
කෙසේ නමුත්, මින් පෙර අදාල පොහොර තොගය නිසි ප්‍රමිතියෙන් තොර අහිතකර පොහොර බවට හෙළිවූ විට අමාත්‍යවරයා ඒ බව පිළිනොගත් අතර ඔහු මාධ්‍ය හමුවේ කියා සිටියේ එම පොහොර නිසි ප්‍රමිතියෙන් යුතු බවයි. කෙසේ නමුත් දෙවන පරීක්ෂණයෙන්ද එම පොහොර නිසි ප්‍රමිතියෙන් තොර බව සහතික වීමෙන් අනතුරුව “චීනයෙන් කාබනික පොහොර ආනයනය නතර කරන බවට කෘෂිකර්ම ඇමති කියයි” යන සිරස්තලය යටතේ අමාත්‍යවරයාගේ මාධ්‍ය ලේකම්වරයා මාධ්‍ය නිවෙිදනයක් නිකුත් කරනු ලැබුවා.
නමුත් පසුව නැවතත් නිවේදනයක් නිකුත් කරමින් අමාත්‍යවරයාගේ මාධ්‍ය ලේකම් ජයසූරිය උඩුකුඹුර ප්‍රකාශ කර සිටියේ චීනයෙන් නොව අදාල චීන සමාගමෙන් පමණක් පොහොර ගෙන්වීම නතර කර ඇති බවයි.
එසේ වුවත් ඊයේ පැවති මාධ්‍ය සාකච්ඡාවේදී අමාත්‍යවරයා ප්‍රකාශ කර සිටියේ අදාල සමාගමෙන්ම පොහොර ගෙන්වන බවයි.
