මාර්තු මස පළමුවැනිදා සිට මාර්තු මස 16 දක්වා මුද්‍රණය කර ඇති මුළු මුදල් ප්‍රමාණය රු. බිලියන 132.66 ක් බව හිටපු ආණ්ඩුකාර රජිත් කීර්ති තෙන්නකෝන් මහතා පවසනවා.
ඔහු පවසන්නේ අද දිනයේත් (මාර්තු 18) මහබැංකුව විසින් මුදල් අච්චු ගසා ඇතත් අදාළ මුදල් ප්‍රමාණය රහසිගතව තබාගෙන ඇති බවයි.
ජනපති ගෝඨාභය රාජපක්ෂ පාලනය තුළ පමණක් රුපියල් මිලියන පහළොස් ලක්ෂ හැට නව දහසක් (රු. මිලියන 1,569,290) ක මුදල් ප්‍රමාණයක් මුද්‍රණය කර ඇති බව කීර්ති තෙන්නකෝන් මහතා නිවේදනයක් නිකුත් කරමින් පවසා සිටිනවා.
ජාත්‍යන්තර මුල්‍ය අරමුදලේ නිර්දේශ හා උපාය මාර්ගික උපදේශයන් නොතකා හරිමින් ශ්‍රී ලංකා මහ බැංකුව රටත්, ආර්ථිකයත් කාබාසිනියා කරමින් උද්ධමනය අහස උසට නංවන මැරතල් මුදල් අච්චු ගැසීමක නිරත වන බවයි තෙන්නකෝන් මහතා පෙන්වා දෙන්නේ.
මෙම මුදල් අච්චු ගැසීම අතර ජාත්‍යන්තර මුල්‍ය අරමුදලේ නියෝජිතයා සමඟ ජාත්‍යන්තර මුල්‍ය අරමුදලේ සහාය ලබා ගැනීම පිළිබඳ සාකච්ඡා පවත්වන අතරතුර මාර්තු 14 දින අච්චු ගැසූ රු. බිලියන 83 ක් ද ඇතුළත් වන බව ඔහු වැඩිදුරටත් පෙන්වා දෙනවා.
