තාවකාලිකව ශ්‍රී ලංකාව අඩු ආදායම්ලාභී රටක් ලෙස වර්ගීකරණය පහත දමන ලෙසත් යුක්රේනයට ලබාදුන් ආකාරයටම හදිසි ණය ආධාරයක් ශ්‍රී ලංකාවට ලබා දෙන ලෙසත් ලෝක බැංකුවට සහ ජාත්‍යන්තර මූල්‍ය අරමුදලට ඉන්දීය මුදල් අමාත්‍ය නිර්මලා සීතාරාමන් මහත්මිය නිර්දේශ කර ඇතැයි ඉන්දීය මාධ්‍ය වාර්තා කරනවා.
ණය ප්‍රතිව්‍යුහගත කිරීම පහසු වීමටත්, ශ්‍රී ලංකාව මුහුණ දී සිටින දැඩි මූල්‍ය අර්බුදයෙන් ගොඩ ඒම සඳහා බහු පාර්ශවික සහාය ලබා ගැනීමටත් එම වර්ගීකරණය පහත හෙළීම උදව් වනු ඇතැයි මුදල් අමාත්‍ය නිර්මලා සීතාරාමන් මහත්මිය පවසා තිබෙනවා.
පසුගියදා ජාත්‍යන්තර මූල්‍ය අරමුදල සහ ලෝක බැංකුව සමග පැවති සාකච්ඡාවලදී ඉන්දීය මුදල් අමාත්‍ය නිර්මලා සීතාරාමන් මහත්මිය මෙම නිර්දේශ ඉදිරිපත් කළ බවයි ඉන්දීය මාධ්‍ය වාර්තා කරන්නේ
ශ්‍රී ලංකාව ඩොලර් නොමැති වීම හේතුවෙන් අත්‍යාවශ්‍ය ද්‍රව්‍ය ආනයනය කිරීමට අපොහොසත්ව දැඩි මුල්‍ය අර්බුදයකට මුහුණ පා සිටින අවස්ථාවේ ශ්‍රී ලංකාව අඩු ආදායම්ලාභී රටක් ලෙස වර්ගීකරණය පහත දමා ඒ අනූව ශ්‍රී ලංකාවට උදව් කළයුතු බවට සීතාරාමන් මහත්මිය තර්ක කර තිබෙනවා.
