වාහන කිහිපයක් පවතින ආයතනවලට හෝ ව්‍යාපාරවලට එම ආයතනික ලියාපදිංචි බලපත්‍රයට අනුව සියළුම වාහන සඳහා ජාතික ඉන්ධන බලපත්‍රය නිකුත් කිරීමට කටයුතු කරන බව විදුලිබල හා බලශක්ති අමාත්‍ය කංචන විජේසේකර මහතා පවසනවා.
ට්විටර් පණිවිඩයක් නිකුත් කරමින් අමාත්‍යවරයා සදහන් කරන්‌නේ ඒ අනුව ඊට අදාළ වැඩි දියුණු කිරීම් කඩිනමින් සිදු කරන බවයි.
අදාළ ජාතික ඉන්ධන බලපත්‍රය ඊයේ (16) නිකුත් කෙරුණු අතර වාහන කිහිපයක් පැවතියද එක් පුද්ගලයෙකු නමට ලියාපදිංචි කළ හැක්කේ එක් වාහනයක් පමණයි.
එය ව්‍යාපාර ආයතනවලටද පැවතියේ එලෙසම වූ අතර ඊයේ ජාතික ඉන්ධන බලපත්‍රය එළිදක්වන මොහොතේ මාධ්‍යවේදීන් මේ පිළිබඳව අමාත්‍යවරයාගෙන් විමසා සිටියා.
ඒ වන තෙක් මෙම කරුණ කෙරෙහි අවධානය යොමුවී නොතිබූ අතර ඉන් පසුව වාහන කිහිපයක් පවතින ආයතන වලට හෝ ව්‍යාපාරවලට එම ආයතනික ලියාපදිංචි බලපත්‍රයට අනුව සියළුම වාහන සඳහා ජාතික ඉන්ධන බලපත්‍රය නිකුත් කිරීමට කටයුතු සකස් කිරීමට අමාත්‍යවරයා පියවර ගෙන තිබෙනවා.
ඒ අනුව එම වාහන සඳහා එක වාහනයකට වෙන වෙනම QR කේතයක් හිමිවන බව කංචන විජේසේකර අමාත්‍යවරයා පවසනවා.
