අද (28) දිනයේ වෘත්තීය සංගම් 1000 ක එකතුවෙන් දිවයින පුරා ක්‍රියාත්මක වර්ජනය නිසා දිවයිනේ සියලුම නගර පාහේ පාළුවට ගොස් ඇතිබවට තොරතුරු වාර්තා වනවා.
ජිවන වියදම ඉහළ යාම, ඉන්ධන මිල ඉහළ යාම, ගැස් මිල ඉහළ දැමිම, ගැස් හිඟය සහ විදුලි කප්පාදුව වැනි ජනපීඩක ක්‍රියාකලාප හේතුවෙන් ඊට විරෝධය පා මෙම වැඩවර්ජනය ක්‍රියාත්මකයි.
මෙම වැඩවර්ජනයට සහය දක්වමින් නුවරඑලිය දිස්ත්‍රික්කයේ සියලු ම නගරවල වෙළෙඳසල් වසා දැමිමට වෙළෙඳ සංගම් පියවර ගෙන තිබෙනවා.
නුවරඑලිය, හැටන්, තලවකැලේ, කොටගල, නොර්වුඩ්, බගවන්තලාව, මස්කෙලිය යන නගරවල වෙලදසැල්ද වසා දමා අද දිනයේ වෙළඳාම් කටයුතුවලින් ඉවත්වීමට ව්‍යාපාරිකයන් කටයුතු කර ඇති බව අප වාර්තාකරුවන් සදහන් කළා.
කෙසේවෙතත් වර්ජනයක් ක්‍රියාත්මක වුවද රජයේ කාර්යාල වෙත සේවකයින්ගේ පැමිණීමක් දක්නට ලැබෙන බව වාර්තා වනවා.
නමුත් ශ්‍රී ලංකා පරිපාලන සේවා සංගමය අද පැවැත්වෙන වර්ජනයට සහය පළ කරන බව එහි ලේකම් ප්‍රදීප් ලක්ෂාන්ත මහතා පවසනවා.
කොග්ගල වෙළෙඳ කලාපයේ සේවක සේවිකාවන්ද ආයතන ඉදිරියට පැමිණ මේ වන විට විරෝධතාවයේ නිරත වනවා.
මේ අතර හැටන් දික්ඔය ප්‍රදේශයේ වතු කම්කරුවන් හැටන් බගවන්තලාව ප්‍රධාන මාර්ගයට පිවිස උද්ඝෝෂණයක් ආරම්භ කර තිබෙනවා.
තවදුරටත් රට ආර්ථික වශයෙන් දුර්වල නොකොට ආණ්ඩුවට බලයෙන් ඉවත්වන ලෙසට බලකරමින් මෙම විරෝධතාවය පැවැත්වෙනවා.
මේ අතර කිසිදු ආර්ථික මධ්‍යස්ථානයකට අද දිනයේ එළවළු තොග ලැබී නොමැති බව සමස්ත ලංකා ඒකාබද්ධ ආර්ථික මධ්‍යස්ථාන හා මැනිං වෙළද සංගමයේ භාණ්ඩාගාරික නිමල් අත්තනායක මහතා පවසනවා.
