අද (28) දිනයේ පැවැත්වෙන වැඩවර්ජන මාලාව හේතුවෙන් විවිධ පාර්ශවයන් හා ආයතනයන් වෘත්තීය ක්‍රි‍යාමාර්ගවල නිරත වුවද කිසිදු ආකාරයක පොදු ප්‍රවාහනය තුළ එවැන්නක් සිදු නොවන බව ප්‍රවාහන අමාත්‍ය දිලුම් අමුණුගම පවසනවා.
දුම්රිය හා බස් රථ වෘත්තීය සංගම් සමඟ සාකච්ඡා කළ බවත් ඔවුන් වර්ජනය නොකර සිටීමට එකඟතාවකට පැමිණි බවත් අමාත්‍යවරයා ඊයේ (27) පැවති ප්‍රවෘත්ති සාකච්ඡාවකදී සඳහන් කළා.
මේ මොහොතේ වර්ජනය කිරීමෙන් අපහසුතාවට පත් වන්නේ දුප්පත් මහජනතාවම බව පැවසූ අමාත්‍යවරයා, වර්ජකයින්ගේ පණිවිඩය ජනාධිපතිවරයා හා අගමැතිවරයා තේරුම් ගැනීමට උත්සාහ කරමින් යම් යම් විසඳුම්වලට එළැඹීමට තීරණය කර ඇති බවත් සඳහන් කරනවා.
තමන් වැනි ම දුප්පත් ජනතාව පීඩාවට පත් කරමින් සිදු කරන මෙම වර්ජනවල කිසිම අර්ථයක් නැති බවයි අමාත්‍යවරයා සඳහන් කරන්නේ.
අමාත්‍යවරයා එසේ සඳහන් කළද දුම්රිය වෘත්තීය සමිති සන්ධානය ඊයේ මධ්‍යම රාත්‍රියේ සිට එක්දින වැඩවර්ජනයක් ක්‍රියාත්මක කර තිබෙනවා.
දුම්රිය සාමාන්‍යාධිකාරිවරයාද නිවේදනය කරන්නේ දුම්රිය කාර්ය මණ්ඩලය අසනීප නිවාඩු වාර්තා කර ඇති බැවැනි අද දිනයේ දුම්රිය ගමනාගමනය අඩාලවී ඇති බවයි.
මේ හේතුවෙන් විකල්ප ප්‍රවාහන මාධ්‍ය භාවිතා කරන ලෙස දුම්රිය සාමාන්‍යාධිකාරීවරයා පවසනවා.
