සමස්ත රාජ්‍ය සේවයකයන් හටම අවම වශයෙන් රුපියල් 18,000 ක වැටුප් වැඩිවීමක් ලබාදෙන ලෙස ශ්‍රී ලංකා රාජ්‍ය නිලධාරී වෘත්තීය සමිති සම්මේලනය ඉල්ලා සිටිනවා.
ජනාධිපති ගෝඨාභය රාජපක්ෂ මහතාට ලිපියක් යොමුකරමින් එම සංගමයේ ජාතික සංවිධායක බී.ඒ.පී. බස්නායක මහතා පවසන්නේ බැසිල් රාජපක්ෂ මහතා ඉදිරිපත් කර ඇති අයවැය යෝජනා මගින් සමස්ත රාජ්‍ය සේවයම අමතක කර සාමාන්‍ය ජනතාව මෙන්ම තමන්වද කබලෙන් ලිපට ඇද දමා ඇති බවයි.
භාණ්ඩ මිල මෙලෙස ඉහළ යාමට පෙරද ලැබුණු වැටුපද සෑහීමකට පත්විය නොහැකි තත්ත්වයක් තුළදී 2022 අයවැය තුළින්ද සහනයක් නොලැබීම තුළින් රාජ්‍ය සේවකයා දැඩි අපහසුතාවයට පත්ව ඇති බවයි ඔවුන් සදහන් කරන්නේ.
රාජ්‍ය අංශයේ සංගණන අනුව හතර දෙනෙකුගෙන් යුත් පවුලකට මසකට සාමාන්‍යයෙන් රුපියල් 58000 ක මුදලක් අවශ්‍ය බව සදහන්ව තිබුණද වර්තමානයේ පවතින බඩුමිල සමග ජීවත්වීම අපහසු බව ශ්‍රී ලංකා රාජ්‍ය නිලධාරී වෘත්තීය සමිති සම්මේලනය පෙන්වා දෙනවා.
එබැවින් රාජ්‍ය සේවයේ නියුතු සේවකයින් හට අවම වශයෙන් රුපියල් 18,000 ක වැටුප් වැඩිවීමක් ලබා නොදෙන්නේ නම් පූර්ව දැනුම්දීමකින් තොරව වෘත්තීය ක්‍රියාමාර්ග සඳහා යොමුවන බවට එම සංගමය නිවේදනය කරනවා.
