හානිකර බැක්ටීරියා සහිත බවට නැවත නැවතත් තහවුරු වූ අහිතකර චීන කාබනික පොහොර රැගැත් ‘හිපෝ ස්පිරිට්’ නෞකාව ශ්‍රී ලංකා මුහුදේ වැලිගමට නාවික සැතපුම් 61 ක් දුරින් ඇති බව නාවික හමුදා ගමනාගමන වෙඩ් අඩවිය තහවුරු කර සිටිනවා.
කෙසේ වෙතත්, අදාල නෞකාවේ ඇති කාබනික පොහොර මෙරටට ගොඩබෑමට කිසිඳු අවසරයක් ලබාදී නොමැති බවයි කෘෂිකර්ම අමාත්‍යාංශය අවධාරණය කරන්නේ.
අදාළ නෞකාවට පොහොර පැටවීම සඳහා ද කිසිදු අවසරයක් මෙරටින් නිකුත් කර නොමැති බවත් කෘෂිකර්ම අමාත්‍යාංශයේ ලේකම්, ජ්‍යෙෂ්ඨ මහාචාර්ය උදිත් කේ. ජයසිංහ මහතා අවධාරණය කර සිටිනවා.
එමෙන්ම, නෞකාවේ ඇති කාබනික පොහොර සාම්පල තුන්වන පාර්ශවයක් මගින් යළි පරික්ෂා කිරීමේ කිසිදු සුදානමක් නොමැති බවත්, කෘෂිකර්ම දෙපාර්තමේන්තුව අවධාරණය කරනවා.
කෘෂිකර්ම දෙපාර්තමේන්තුව එසේ පැවසුවද චීන කාබනික පොහොර සඳහා වන ණයවර ලිපියට අදාල ගෙවීම් සිදුකිරීමට තම බැංකුව බැඳී සිටින බවට මහජන බැංකුවේ රධාන විධායක නිලධාරී සහ සාමාන්‍යාධිකාරී රංජිත් කොඩිතුවක්කු මහතා පවසනවා.
පොහොර සාම්පල පරීක්ෂාවට පෙරම, කොන්දේසි මාලාවකට අනුකූලව ණයවර ලිපිය විවෘත කළ බවත් චීන පොහොර නැව මෙරටට පැමිණියේ එය පදනම් කරගෙන බවත් ඔහු පවසනවා.
වාණිජ බලපත්‍රයක් ලබා නොදීම නැව මෙරටට පැමිණ ඇති බව අමාත්‍යවරයා පවසන නමුත් නැවක් පැමිණෙන්නේ ලියවිලි මත මිස භාණ්ඩ මත පදනම්ව නොවන බව ඔහු පෙන්වා දෙනවා.
භාණ්ඩ සඳහා වන වගකීම ඇත්තේ ආනයනකරු සහ අපනයනකරු සතුව බවත් මුදල් නොගෙවන බවට දේශපාලඥයන් පැවසුවද ණයවර ලිපි විවෘත කර මෙරටට පැමිණි නැවට ඩොලර් මිලියන 09ක මුදල ගෙවීමට මහජන බැංකුව බැඳී සිටින බවත් ඒ මහතා පවසනවා.
මේ දක්වා අදාල ගෙවීම් සිදු කිරීමට මහජන බැංකුවට නොහැකි වූයේ අධිකරණ වාරණ නියෝගයක් හේතුවෙන් බවත් ඔහු පවසනවා.
