යම් පිරිසක්විසින් කොල්ලුපිටිය අරලියගහ මන්දිරය ඉදිරියේ පදික වේදිකාව අවහිර වන පරිදි සහ මහජන පීඩාවක් ඇති වන පරිදි විරෝධතාවයේ යෙදෙමින් සිටින බැවින් එම ජනතාව ඒකරාශී වීම වැලැක්වීමට 106 වගන්තිය ප්‍රකාරව ඒකපාර්ශ්වික නියෝගයක් කොල්ලුපිටිය පොලීසිය විසින් අළුත්කඩේ අංක 4 මහේස්ත්‍රාත් අධිකරණයෙන් අද (25) ඉල්ලා සිටියා.
කෙසේ නමුත් එය සලකා බැලූ මහේස්ත්‍රාත් හර්ෂණ කැකුණවෙල එම ඉල්ලීම ප්‍රතික්ෂේප කරනු ලැබුවා.
ඒ, මෙම උද්ඝෝෂණයට සහභාගී වන නිශ්චිත පිරිසක් නම් නොකොට ඉල්ලන ඉල්ලීම් සදහා තමන්ට නියෝග නිකුත් කළ නොහැකි බව පවසමින්.
අදාල පිරිස් විසින් කඩාකප්පල්කාරී ක්‍රියාවන් සිදුකළහොත් එයට පොලිස් බලය පාවිච්චි කරන ලෙස පමණක් මෙහිදී මහේස්ත්‍රාත්වරයා පොලීසියට දැනුම් දුන්නා.
මේ අතර, පොලිසිය විසින් ඊයේ දින කටුකම්බි සහිත මාර්ග බාධක යොදා ඒවා ඉටිකොළ මගින් ආවරණය කරමින් සිතාමතාම ජනතාවට තුවාල සිදු කිරීමට බලාපොරොත්තු වීම සම්බන්ධව මාධ්‍ය වේදීන් විසින් මානව හිමිකම් කොමිසමට සහ පොලිසියට පැමිණිලි සිදු කර තිබූ අතර මේ සම්බන්ධව නීතීඥ සංගමයේ අවධානය ද ලැබී තිබුණා.
