‘එක රටක් එක නීතියක්’ සදහා වූ ජනාධිපති කාර්ය සාධක බලකායේ සාමාජිකයින් ලෙස දෙමළ ජාතිකයින් තිදෙනෙක් ජනාධිපති ගෝඨාභය රාජපක්ෂ මහතා විසින් පත්කර තිබෙනවා.
ඒ අනුව රාමලිංගම් චක්‍රවර්ති කරුණාකරන්, යෝගේෂ්වරී පත්ගුණරාජා සහ අයියාම්පිල්ලෙයි දයානන්දරාජා යන සාමාජිකයින් තිදෙනා පත් කළ බව ජනාධිපති මාධ්‍ය අංශය නිවේදනය කරනවා.
මීට පෙර මෙම ජනාධිපති කාර්ය සාධක බලකාය සඳහා දෙමළ ජාතික සාමාජිකයින් ඇතුළත් නොවුණු අතර ඊට විවිධ පාර්ශව වලින් දැඩිව චෝදනා එල්ල වුණා.
එමෙන්ම ‘එක රටක් එක නීතියක්’ සදහා වූ ජනාධිපති කාර්ය සාධක බලකායේ සභාපතීත්වයට බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥාණසාර හිමියන් පත්කිරීම පිළිබදව සමාජයෙන් දැඩි විරෝධයක් එල්ලවී තිබෙනවා.
ඊට විරෝධය පා අධිකරණ අමාත්‍ය අලි සබ්රි මහතාද සිය ඇමති ධූරයෙන් හා මන්ත්‍රී ධූරයෙන්ද ඉල්ලා අස්වීමට සූදානම් වූ බවට තොරතුරු වාර්තා වුණා.
මේ අතර මෙම ජනාධිපති කාර්ය සාධක බලකායට ජනාධිපතිවරයා විසින් පත්කරන ලද මහාචාර්ය දයානන්ද බණ්ඩා මහතා සහ කථිකාචාර්ය මොහොමඩ් ඉන්තිකාබ් මහතා එහි සාමාජිකත්වයෙන් ඉල්ලා අස්වී තිබෙනවා.
