පසුගියදා කිරිඇල්ල ප්රදේශයේදී ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු ඇතුළු පොලිස් නිලධාරීන් පිරිසකගේ පහරකෑමට ලක්වූ බව පැවසෙන වින්දිතයා ශ්රේෂ්ඨාධිකරණයට මූලික අයිතිවාසිකම් පෙත්සමක් ගොනුකර තිබෙනවා.
අදාළ පෙත්සම ගොනුකරමින් රාජගිරියේ පදිංචි මිෂාර රණසිංහ මහතා අධිකරණයෙන් ඉල්ලා සිටින්නේ දණ්ඩ නීති සංග්රහය සහ වධහිංසා පනත යටතේ නීතිවිරෝධී ලෙස හැසිරීම සම්බන්ධයෙන් ජ්යෙෂ්ඨ නියෝජ්ය පොලිස්පති ඇතුළු පොලිස් නිලධාරීන් පස් දෙනෙකුට එරෙහිව ක්රියාමාර්ග ගැනීමට නීතිපතිවරයාට නියෝග කරන ලෙසයි.
එමෙන්ම පෙත්සම්කරු වැඩිදුරටත් ඉල්ලා සිටින්නේ වගඋත්තරකරුවන් ශ්රී ලංකා පොලිස් දෙපාර්තමේන්තුවේ නිලධාරීන් ලෙස නිලතල දැරීමට නුසුදුසු බවට ප්රකාශ කරන ලෙසයි.
රත්නපුරයේ සිට පානදුර දෙසට ගමන් කරමින් සිටියදී 2021 ඔක්තෝම්බර් 25 වැනි දින පස්වරු 2 ට පමණ ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු සහ තවත් පොලිස් නිලධාරීන් දෙදෙනෙකු විසින් තමාට දරුණු ලෙස පහරදී, ශාරීරික හා ලිංගික වධහිංසා පමුණුවා හිරිහැර කළ බව පෙත්සම්කරු අධිකරණයට දැනුම්දී තිබෙනවා.
ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු, කිරිඇල්ල වැඩබලන ස්ථානාධිපති දිසානායක, අයගම පොලිස් ස්ථානයේ ස්ථානාධිපති ඉන්දික මිලාන්, පොලිස් ප්රධානී චන්දන වික්රමරත්න, නීතිපති සහ තවත් කිහිප දෙනෙක් පෙත්සමෙන් වගඋත්තරකරුවන් ලෙස නම්කර තිබෙනවා.
සබරගමුව පළාත භාර ජ්යෙෂ්ඨ නියෝජ්ය පොලිස්පතිවරයා සිවිල් වැසියෙකුට පහරදීමේ සිද්ධියකට සම්බන්ධ බවට සමාජ මාධ්ය ජාලා ඔස්සේ හුවමාරු වූ වීඩියෝවක් මත ඔහුව වෛද්ය සේවා සහ සුබසාධන කොට්ඨාශයේ ජ්යෙෂ්ඨ නියෝජ්ය පොලිස්පතිවරයා ලෙස ස්ථාන මාරු කර ඇති බව පොලිස් මූලස්ථානය නිවේදනය කර තිබුණා.