ඉන්දියාවේ 15 වැනි ජනාධිපතිවරයා අද (21) තෝරා පත් කර ගැනීමට නියමිතයයි.
අදාළ ඡන්ද විමසීමේ මනාප ගණන් කිරීමේ කටයුතු අද (21) පෙරවරු 11.00ට ඇරඹි බවයි ඉන්දීය මාධ්‍ය වාර්තා කරන්නේ.
අදාළ ජනාධිපතිවරණ ඡන්ද විමසීම පසුගිය සඳුදා පාර්ලිමේන්තු සභා ගර්භය ඇතුළු ස්ථාන 31ක දී සහ ප්‍රාන්ත ව්‍යවස්ථාදායක සභාවන් තුළ මධ්‍යස්ථාන 30ක දී පැවැත් වුණා. භාරතීය ජනතා පක්ෂය ප්‍රමුඛ පක්ෂ නියෝජනය කරමින් ජනාධිපතිවරණයට තරග වදින්නේ ගෝත්‍රික සම්භවයක් ඇති ද්‍රෞපදී මුර්මුයි.
ඇයගේ ප්‍රතිවාදියා ලෙස විපක්ෂ කණ්ඩායම් නියෝජනය කරමින් ඉදිරිපත් වූයේ යෂ්වන්ත් සිංහා යි. නමුත් බොහෝ දුරට ඉන්දියාවේ මීළඟ ජනාධිපති ලෙස ද්‍රෞපදී මුර්මු තේරී පත් වීමට වැඩි ඉඩකඩක් තිබෙන බවයි ඉන්දීය මාධ්‍ය සහ සමාජ මාධ්‍ය වාර්තා දක්වන්නේ.
මේ අතර, බ්‍රිතාන්‍යයේ මීළඟ අගමැතිවරයා තෝරාගැනීමේ සටන උණුසුම් වෙමින් පවතින බව ජාත්‍යන්තර මාධ්‍ය පවසනවා.
කොන්සවේටිව් පක්ෂ නායකත්වය ට රිෂී සුනක් සහ ලිස් ට්‍රස් යන දෙදෙනාගෙන් කෙනෙක් පත්වීමට නියමිත අතර එසේ පත්වන තැනැත්තාට එරට මීළඟ අගමැතිවරයා ලෙස පත්වීමට අවස්ථාව හිමිවෙනවා.
කොන්සවේටිව් පක්ෂ සාමාජිකයින් 160,000ක් තැපැල් හෝ මාර්ගගත ක්‍රමවේදය ඔස්සේ අගෝස්තු සිට සැප්තැම්බර් 02ත් අතර කාලය ඡන්දය ප්‍රකාශ කිරීමට නියමිත අතර ජයග්‍රාහකයා සැප්තැම්බර් 05 වනදා නිවේදනය කෙරෙනු ඇති.
බොරිස් ජොන්සන් එතෙක් බ්‍රිතාන්‍ය අග්‍රාමාත්‍යවරයා ලෙස කටයුතු කිරීමට නියමිත වනවා.
