අවශ්‍ය සියලු පාර්ශව සහ ස්වාධීන විශේෂඥයින්ගේ උපදෙස් වහාම ලබාගෙන ගෑස්, ඉන්ධන, විදුලිය, කිරිපිටි, ඖෂධ හා ආහාර හිඟයකින් තොරව ජනතාවට ලබාදීමට ක්‍රියාමාර්ග ගන්නැයි කැබිනට් මණ්ඩලයට හා වගකිව යුත්තන්ට නියෝග කරන ලෙස ඉල්ලා ශ්‍රී ලංකා නීතිඥ සංගමය ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් දෙකක් අද (25) ගොනු කළා.
ශ්‍රී ලංකා නීතිඥ සංගමය පෙන්වා දෙන්නේ මෙම අත්‍යවශ්‍ය භාණ්ඩ සහ සේවා හිඟවීමෙන් නීතියේ ආධිපත්‍යයට සහ මහජන සාමයට බලපෑමක් එල්ලවන බවයි.
වහාම මෙම තත්ත්වය සමනය නොකලහොත් තවදුරටත් නීතියේ ආධිපත්‍යයට සහ මහජන සාමයට බලපෑම් එල්ලවිය හැකි බව ඔවුන් සිය පෙත්සම් දෙකෙන් පෙන්වා දී තිබෙනවා.
ශ්‍රී ලංකා නීතිඥ සංගමයේ සභාපතිවරයා සහ උප සභාපතිවරයා ඇතුළු නිලධාරී මණ්ඩලය ගොනුකල මෙම පෙත්සම් දෙකෙහි සදහන් වන්නේ හිඟයකින් තොරව ජනතාවට අත්‍යාවශ්‍ය භාණ්ඩ හා සේවා ලබාදීමට අසමත්වීමෙන් ව්‍යවස්ථාවෙහි සදහන් කර ඇති ජනතාවගේ මූලික අයිතිවාසිකම් කඩවන බවයි.
නීතිපතිවරයා, සියලුම කැබිනට් ඇමතිවරුන්, මහබැංකු අධිපතිවරයා, භාණ්ඩාගාර ලේකම්වරයා, අමාත්‍යංශ කිහිපයක ලේකම්වරුන්, විදුලිබල මණ්ඩලය, ඛනිජ තෙල් නීතිගත සංස්ථාව හා රාජ්‍ය ඖෂධ නීතිගත සංස්ථාව ඇතුළු පාර්ශවකරුවන් මෙම පෙත්සම්වල වගඋත්තරකරුවන් කර තිබෙනවා.
