කඩුවෙල ප්‍රදේශයට නව පොලිස් ස්ථානයක් ලබාදෙන බව පවසමින් කඩුවෙල අධිවේගී පිවිසුම ආසන්නයේ අලුතින් ආරම්භ කළ කඩුවෙල පොලිස් ස්ථානය පිහිටි ගොඩනැගිල්ලේ හිමිකරුට මේ වන තෙක් කිසිදු කුලී මුදලක් ගෙවා නොමැතිබවට තොරතුරු වාර්තා වනවා.
ගොඩනැගිල්ලේ හිමිකරු පවසන්නේ මසකට ලක්ෂ 2 බැගින් වූ කුලී පදනම මත අදාළ ගොඩනැගිල්ලෙහි පොලිස් ස්ථානයක් ආරම්භ කිරීම සඳහා එය ලබාදුන් බවයි.
බදු ඔප්පුවක් හෝ අත්සන් කිරීමකින් තොරව ලියවිල්ලක් මත පමණක් පොලීසිය එය ලබාගෙන ඇති අතර පොලිස් ස්ථානය ආරම්භ කර මාස 10 ක් ගතව ඇතත් ඒ වෙනුවෙන් තමන්ට කිසිදු ගෙවීමක් මේ වන තෙක් සිදු නොකළ බව ගොඩනැගිල්ලේ හිමිකරු පවසනවා.
ඒ අනුව මේ වන විට පොලීසිය අදාළ ගොඩනැගිල්ලේ හිමිකරුට රුපියල් ලක්ෂ 20 ක් ණය වී තිබෙනවා.
මේ අතර කඩුවෙල පොලිස් ස්ථානයේ නිලධාරීන් හට නවාතැන් ගැනීම සඳහා ගත් කුළී නිවසටද මාස 09 ක කාලයක පටන් කිසිදු මුදලක් ගෙවා නොමැති බව එම නිවසේ හිමිකරුද පවසනවා.
පසුගිය වසරේ ජූලි 13 වන දින එවකට මහජන ආරක්ෂක අමාත්‍ය සරත් වීරසේකර මහතා විසින් කඩුවෙල නව පොලිස් ස්ථානය විවෘත කරනු ලැබූවා.
කොවිඩ් වසංගත තත්ත්වය තුළ රට වසා දමා තිබියදීත් ඔහුගේ පාලන සමය තුළ නව පොලිස් ස්ථාන කිහිපයක්ම විවෘත කිරීමට අමාත්‍යවරයා කටයුතු කළා.
එම අවස්ථාවන් උත්සවාකාරයෙන් පිරිස් ඒකරාශීකර පැවැත්වීම පිළිබදව එකල අමාත්‍යවරයාට දැඩිව චෝදනා එල්ල වුණා.
මේ අතර පොලිස් ස්ථානවලට කුළී ගෙවීමට මහජන ආරක්ෂක අමාත්‍යංශයට මුදල් නොමැති වුවද විරෝධතාකරුවන්ට කඳුළු ගෑස් ගැසීමට නව කඳුළු ගෑස් හා එම අවස්ථාවන්හීදී භාවිතා කිරීමට විශේෂ මුහුණු ආවරණද මිලදී ගෙන තිබෙනවා.
ඊයේ (24) ගාලු මුවදොර අසල අටවා තිබූ ස්ථීර පොලිස් මාර්ග බාධක අසළ මෙම නව මුහුණු ආවරණ ගොඩගසා තිබූ අතර ඒවා ආනයනික මට්ටමෙන්ම පෙට්ටිවල බහා විවෘත නොකර තිබෙන අයුරු දක්නට ලැබුණා.
