බණ්ඩාරවෙල නගරයේ ඉන්ධන පිරවුම්හල් අසළ අද (30) පෙරවරුවේ රැඳී සිටි ජනතාවට හිටිහැටියේ වාහන ඉවත් කරගන්නා ලෙස ප්‍රභූ ආරක්ෂාව භාරව සිටින කණ්ඩායමක් විසින් දැනුම් දී තිබෙනවා.
අද දින ක්‍රීඩාංගනයක් විවෘත කිරීමට පැමිණෙන ක්‍රීඩා අමාත්‍ය නාමල් රාජපක්ෂ මහතාගේ ආරක්ෂාව භාරව සිටින ඇමති ආරක්ෂකයින් පිරිසක් මෙලෙස පෝලිම්වල සිටින ජනතාව ඉවත්කිරීමට කටයුතු කර ඇති බවයි වාර්තා වන්නේ.
ඔවුන් දැනුම් දී ඇත්තේ නාමල් රාජපක්ෂ මහතා පැමිණෙන බැවින් වාහන ඉවත් කරගෙන මාර්ගයේ ඉඩ ලබාදෙන ලෙසයි.
ඉන් ප්‍රකෝපයට පත් වූ ජනතාව වාහන ඉවත් කරගන්නවා වෙනුවට මාර්ගය වසා දමමින් වාහන මග නවතා දමමින් නාමල් රාජපක්ෂ මහතා වෙත තම විරෝධය පළ කර තිබෙනවා.
අදාළ විරෝධතාවය හේතුවෙන් බදුල්ල – බණ්ඩාරවෙළ මාර්ගය අවහිරවී තිබෙනවා.
අදාළ සිදුවීම පිළිබදව ට්විටර් පණිවුඩයක් නිකුත් කරමින් ක්‍රීඩා අමාත්‍ය නාමල් රාජපක්ෂ මහතා අපහසුතාවයට පත්වූ බණ්ඩාරවෙළ ජනතාවගෙන් සමාව ඉල්ලා සිටිනවා.
ඔහු පවසන්නේ වැලිමඩ ප්‍රදේශයේ තමන් සහභාගීවන කිසිදු උත්සවයක් නොමැති බවයි.
කෙසේවෙතත් නාමල් රාජපක්ෂ මහතා සහභාගීවන උත්සවයක් වැලිමඩ නොව බණ්ඩාරවෙල පැවැත්වීමට නියමිතව තිබුණා.
ඒ අද පස්වරු 2 ට බණ්ඩාරවෙල ‘නලින් ප්‍රියන්ත සූරියගේ ක්‍රීඩාංගණය’ විවෘත කිරීමේ උක්සවයයි.
එහිදී ක්‍රීඩා අමාත්‍යවරයා ප්‍රදර්ශන පාපන්දු තරගයකට සහභාගිවීමට ද සැලසුම් කර තිබුණා.
