බුද්ධිමතුන් රට හැරයාම සහ මැයි 09 ප්‍රහාර අතර සම්බන්ධයක් ඇතැයි කැබිනට් මාධ්‍ය ප්‍රකාශක බන්දුල ගුණවර්ධන අමාත්‍යවරයා සිදු කළ ප්‍රකාශය ඔහුගේ පුද්ගලික ප්‍රකාශයක් බව අමාත්‍ය මණ්ඩල කාර්යාලය පවසනවා.
2016 අංක 12 දරන තොරතුරු දැනගැනීමේ අයිතිවාසිකම් පිළිබඳ පනත යටතේ කරන ලද ඉල්ලීමකට ප්‍රතිචාර ලෙසින් අමාත්‍ය මණ්ඩල කාර්යාලය මෙසේ දැනුම් දී තිබුණා.
පසුගිය අගෝස්තු 15 වන දින හෝ ඒ ආසන්න දිනයක පැවති රජයේ නිල කැබිනට් තීරණ දැනුම් දීමේ සාකච්ඡාවකදී බන්දුල ගුණවර්ධන මහතා මෙසේ ප්‍රකාශ කළා.
“මැයි 09වනදා ඇති වූ සිදුවීම් හේතුකොට ගෙන රටේ බොහෝ විද්වතුන්ට අවිශ්වාසයක් සැකයක් රට සම්බන්ධයෙන් ඇතිව තිබෙනවා.”
මෙම ප්‍රකාශය කැබිනට් මණ්ඩලයේ නිල ස්ථාවරය මත පදනම් වූවක්ද නැතිනම් අමාත්‍ය බන්දුල ගුණවර්ධන මහතාගේ පුද්ගලික ප්‍රකාශයක්ද යන්න පිළිබඳව සමාජ මාධ්‍ය ක්‍රියාකාරී අනුරුද්ධ බණ්ඩාර මහතා තොරතුරු දැනගැනීමේ අයිතිවාසිකම් පිළිබද පනත යටතේ අමාත්‍ය මණ්ඩල කාර්යාලය වෙත ලිපියක් යොමුකර තිබුණා.
එහිදී ඔවුන් පවසා ඇත්තේ එම කාර්යාලය සතු තොරතුරු අනුව බන්දුල ගුණවර්ධන මහතාගේ ප්‍රකාශය අමාත්‍ය මණ්ඩල තිරණයක් මත පදනම් වූ බවක් හෝ අමාත්‍ය මණ්ඩලයේ නිල ස්ථාවරය මත පදනම් වූවක් නොවන ලෙස නිරීක්ෂණය වන බවයි.
එමෙන්ම මාධ්‍යවේදියෙකු විසින් අසන ලද ප්‍රශ්නයකට පිළිතුරක් වශයෙන් ප්‍රකාශ කරන ලද්දක් නිසා කැබිනට් අමත්‍යවරයෙකු විසින් මාධ්‍ය වෙත කරනු පදනම් විරහිත ප්‍රකාශයක් සම්බන්ධයෙන් පියවර ගැනීමට අමාත්‍ය මණ්ඩල කාර්යාලට බලයක් නැති බවද පිළිතුරු ලිපිය මගින් අමාත්‍ය මණ්ඩල කාර්යාලය පෙන්වාදී තිබුණා.
අදාළ ලිපිය පහතින්,
