අග්රාමාත්ය මහින්ද රාජපක්ෂට සහ කැබිනට් මණ්ඩලයට නිල වශයෙන් ඉල්ලා අස්වන ලෙසට නිල වශයෙන් අද (28) සවස ජනාධිපතිවරයාගේ ප්රධානත්වයෙන් පැවැත්වෙන විශේෂ සාකච්ඡාවේ දී දැනුම් දෙනු ඇතැයි ජනාධිපති මන්දිර ආරංචි මාර්ග සඳහන් කරනවා.
පසුගිය දින කිහිපය පුරාවට අග්රාමාත්ය මහින්ද රාජපක්ෂ සඳහන් කර සිටියේ තමා ඉල්ලා අස් වීමට සූදානම් නොමැති බවයි. එමෙන්ම, ජනාධිපතිවරයා තමාව ඉවත් නොකරනු ඇතැයි ද ඔහු ඊයේ පවසා සිටියා. ඒ, අග්රාමාත්යවරයා, කැබිනට් මණ්ඩලය සමග ඉල්ලා අස්වීමෙන් අන්තර්වාර රජයක් සඳහා යෑමට හැකි බවට ඊයේ ජනාධිපතිවරයා විසින් කළ ප්රකාශයෙන් අනතුරුවයි.
එහෙත්, රටපුරා සිදුවන අරගල තත්වයන්ගේ උත්සන්න වීම සලකා විකල්ප ක්රියාමාර්ගවලට යොමුවීමට අවකාශය සලසා දෙමින් අග්රාමාත්යවරයාගේ ඉල්ලා අස්වීම කාලෝචිතැයි සලකා ජනාධිපතිවරයා විසින් යළිත් මෙම ඉල්ලීම සිදු කරනු ඇති බවයි පැවසෙන්නේ.
මේ අතර එම ඉල්ලීම පිළිගෙන අගමැතිවරයා ප්රමුඛ පොදුජන පෙරමුණු කණ්ඩායම විපක්ෂයේ අසුන් ගැනීමට සැලසුම් කර ඇති බවත්, ඒ අනුව අගමැතිවරයා සහ ආණ්ඩුව වහාම ඉල්ලා අස්විය යුතු බවට එහි රැඳී සිටිමින් හඬ නගන ඔවුන්ගේම ආණ්ඩුවේ හිටපු ඇමතිවරයෙක් අග්රාමාත්ය ධූරයට පත් කරගනු ඇති බවත් වැඩිදුරටත් පැවසේ.