සහල් මෙට්‍රික් ටොන් ලක්ෂයක් ආනයනය කිරීමට කැබිනට් අනුමැතිය ලැබී ඇති බව වෙළඳ අමාත්‍ය බන්දුල ගුණවර්ධන මහතා පවසනවා.
එලෙස විදෙස් රටවල් වලින් ආනයනය කරන සහල් රුපියල් 100ට අඩු මිලකට ලබා ගැනීමට කඩිනමිල් ඉඩ සලස්වන බවයි ඔහු පවසන්නේ.
ජනතාවට අවශ්‍ය සහල් සාධාරණ මිලකට දේශීය වෙළඳපොලේ මිලදී ගැනීමට නොමැති නම් සහ වෙළඳපොලට සහල් නිකුත් කිරීම සීමා කර ඇත්නම් රජයට ඊට මැදිහත්වීමට සිදුවන බවත් එහිදී සහල් පිටරටින් ආනයනය කර හෝ සාධාරණ මිලකට පාරිභෝගිකයාට ලබාදීම රජයක යුතුකම වන බවත් ඔහු පවසනවා.
එබැවින්, මෙලෙස සහල් මෙට්‍රික් ටොන් ලක්ෂයක් ආනයනය කිරීමට තීරණය කළ බවයි ඔහු පෙන්වා දෙන්නේ.
තවද, සහල් මාෆියාවට සහ මහා පරිමාණ වී මෝල් හිමියන්ට පාරිභෝගිකයන් ගසාකෑමට ඉඩ ලබාදී නිහඬව සිටීමට රජය සූදානම් නොමැති බව අමාත්‍ය බන්දුල ගුණවර්ධන මහතා අවධාරණය කර සිටිනවා.
සහල් තොග වෙළෙඳාමට සහ සිල්ලර වෙළෙඳාමට පනවා තිබූ මිල පාලනය ඉවත් කිරීමට පෙරේදා (27) පස්වරුවේ පැවති අමාත්‍ය මණ්ඩල රැස්වීමෙදි තීරණය කරනු ලැබුවා.
ඒ අනුව, ඉකුත් සැප්තැම්බර් මස 02 දින සහල් සඳහා උපරිම තොග හා සිල්ලර මිලක් නියම කරමින් නිකුත් කළ ගැසට් නිවේදනය අවලංගු විය.
ඉන් පසුව, සහල් සඳහා නව මිල ගණන් මහාපරිමාණ මොල් හිමියන් විසින් ප්‍රකාශයට පත් කළා.
ඒ අනුව නාඩු කිලෝවක මිල රුපියල් 115 ක් ලෙසත්, සම්බා කිලෝවක් රුපියල් 140 ක් ලෙසත්, කීරි සම්බා කිලෝවක් රුපියල් 165 ක් ලෙසත් මිල ගණන් සංශෝධනය වූ බවයි සහල් මෝල් හිමියන් නිවේදනය කර සිටියේ.
එමෙන්ම, 2021 /2022 මහ කන්නය සදහා කාබනික පොහොර හා ස්වභාවික ඛනිජ හා කිලේටඩ් අංශුමාත්‍ර ශාක පෝෂක හ පිටරටින් ආනයනය කිරීම සදහා කැබිනට් අනුමැතිය හිමිවැති බව ඊයේ (28) පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී නිවේදනය කරනු ලැබුවා
