ගෝඨා ගෝ ගමට පහර දී අදට හරියටම මාසයකි.
සිදුවීම සම්බන්ධයෙන් සැකකරුවෙකු ලෙස නම් කර තිබෙන හිටපු අමාත්‍ය ජොන්ස්ටන් ප්‍රනාන්දු මෙතෙක් අත් අඩංගුවට ගෙන නොමැති අතර, බස්නාහිර පළාත භාර ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන්ට නියම කරන ලද ස්ථාන මාරුව ද මෙතෙක් ක්‍රියාත්මක වී නොමැත.
මේ පිළිබදව ඊයේ (08) දිනයේ දී අධිකරණයේ අවධානය යොමු කරන ලදි.
අපරාධ පරීක්ෂණ දෙපාර්තමේන්තුව වෙනුවෙන් පෙනී සිටින අතිරේක සොලිසිටර් ජෙනරාල් අයේෂා ජිනසේන මහත්මිය, හිටපු අමාත්‍ය ජොන්ස්ටන් ප්‍රනාන්දු අත් අඩංගුවට නොගැනීම පිළිබදව කරුණු දක්වා ඇති අතර, ඔහුට එරෙහිව වරෙන්තුවක් නිකුත් කරන ලෙස අධිකරණයෙන් ඉල්ලා සිටියා ය.
ඒ අනුව, ගරු අධිකරණය ඊයේ දිනයේ දී සැකකරු වහා අත් අඩංගුවට ගන්නා ලෙස වරෙන්තු නිකුත් කළේ ය. ඒ නමුත්, මේ දක්වා හිටපු අමාත්‍ය ජොන්ස්ටන් ප්‍රනාන්දු අත් අඩංගුවට ගැනීමට අපරාධ පරීක්ෂණ දෙපාර්තමේන්තුවට හැකි වී නැත.
ඊට අමතරව, සිද්ධිය වන අවස්ථාවේ අදාල ස්ථානයේ සිටිය ද නිසි ලෙස තත්ත්වය පාලනය කිරීමට අපොහොසත් වූ බස්නාහිර පළාත භාර ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාට ස්ථාන මාරුවක් ලබානොදීම පිළිබදව, විත්තිකරුවන් වෙනුවෙන් පෙනී සිටින නීතීඥ මහතා අධිකරණයේ අවධානය යොමු කර තිබුණි.
ගෝඨාගෝ ගමට මැර ප්‍රහාරය එල්ල වූ මැයි මාසයේ 09 වන දා පෙරවරු 10.00 ට පමණ, පොලිස්පතිවරයා විසින් සූම් සාකච්ඡාවක් කැදවා ප්‍රහාරය පාලනය කිරීමට පියවර ගන්නා ලෙස උපදෙස් දී ඇති බවද අධිකරණය හමුවේ කරුණු හෙළිදරව් විය.
විත්තිකරුවන් වෙනුවෙන් පෙනී සිටින නීතීඥමහතා අධිකරණය හමුවේ කරුණු දක්වා ඇත්තේ, ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන් මීළග පොලිස්පති ලෙස පත්වනු ඇතැයි බොහෝ දෙනෙකු සිතන නිසා, ඔහුට එරෙහිව සාක්ෂි දීමට කිසිදු නිළධාරියෙක් ඉදිරිපත් නොවනු ඇති බවයි.
එබැවින්, ඔහුට ලබාදුන් ස්ථාන මාරුව ක්‍රියාත්මක කිරීමට කටයුතු කරන ලෙස නීතීඥ මහතා අධිකරණයෙන් ඉල්ලා තිබෙනවා.
