පැන්ඩෝරා පත්‍රිකා පිළිබඳ ක්‍රියාත්මක විමර්ශනය පිළිබඳව දැනට බන්ධනාගාරගතව සිටින හිටපු පාර්ලිමෙන්තු මන්ත්‍රී රන්ජන් රාමනායක මහතාගෙන් ප්‍රකාශයක් ලබා ගැනීමට අල්ලස් කොමිසම තීරණය කර තිබෙනවා.
ඔහු විසින් කොමිසමෙන් කළ ඉල්ලිමකට අනුව එම ප්‍රකාශ ලබා ගන්නා බවයි කොමිසම පවසන්නේ.
එය දිවුරුම් ප්‍රකාශයක් ලෙස සිය නීතිඥවරයාගේ මාර්ගයෙන් ලබා දෙන්නැයි රන්ජන් රාමනායක මහතා වෙත දැනුම් දුන් බවත් රන්ජන් රාමනායක මහතා ලබා දෙන දිවුරුම් ප්‍රකාශය අනුව ඉදිරි විමර්ශන ක්‍රියාත්මක කරන බවත් අල්ලස් කොමිසමේ ප්‍රකාශකයක් පවසා සිටිනවා.
මේ වනවිට විමර්ශනයට අදාළව නිරුපමා රාජපක්ෂ මහත්මියගෙන් සහ තිරුකුමාර් නඩේසන් මහතාගෙන් පමණක් ප්‍රකාශ ලබා ගෙන ඇති බවත් පැන්ඩෝරා පත්‍රිකා සම්බන්ධයෙන් ක්‍රියාත්මක විමර්ශන සඳහා දේශීය වාණිජ හා රාජ්‍ය බැංකු , දේශීය ආදායම් දෙපාර්තමේන්තුවෙන් මේ වනවිට ලේඛන කැඳවා ඇති බවත් කොමිසම සඳහන් කර සිටිනවා.
ලෝක නායකයන්, දේශපාලනඥයින් සහ ප්‍රකෝටිපතියන්ගේ රහස්‍ය ධනය, ගනුදෙනු, මූල්‍ය අපරාධ හා මුදල් විශුද්ධිකරණය සම්බන්ධ මූල්‍ය ලේඛන මිලියන 12 කට ආසන්න ප්‍රමාණයක් පැන්ඩොරා පත්‍රිකා මගින් පසුගියදා අනාවරණය කළේ ය.
